My brother this country hard pass Olumo rock. To survive wan come hard pass to die.
Why you still dey for di country na? Why you no kuku japa your thing?
Tah! you think say e dey easy like that? Ask Immigration pipo weda you fit get passport. dem go tell you say rapture don carry dem but if you get #250K passport go comot. People wey dey work for embassy sef don waka sake of di insecurity. To say you hold your passport and visa for hand sef to get dollar na double wahala. Wetin remain now na to roast for here till dem finish election for 2023. Na dat time we go know weda na real hell or semi-hell we don dey inside already.
Sense dey inside your yarn. But you no think say di CBN redesign of naira fit make money comot from where e dey hide? Plus, I hear say America wan recall all dem old-old dollar before early next year. Maybe Government fit use that opportunity to nap all the pipo wey dey tif-tif our money.
Make I hear word! Na today? you know hear say dem lok di EFCC boss, Abdulrasheed Bawa, for disobeying court order? Sake of say him no gree release money wey dem steal, gbam! Dem kuku arrest di pikin.
Baba wey don tey dey violate court order nko? Who go lock am? Where Nnamdi Kanu dey? Wetin dem no do El-Zakzaky?
Who wan lock am? Everybody na potential 'lockee' na. You no fit lock the 'locker'. I even hear say some Arewa youths sef like am as dem embarrass di Bawa guy because e no sweet dem as dem hear say Governor Bello Matawalle of Zamfara State na di next EFCC target.
E come be like say anyboy wey wan fight corruption for EFCC no dey end well. See as dem dabaru Ribadu. Magu put him hand for mago-mago, now Bawa don dey sawa. Na only Farida waka comot her thing.
But na dat woman grap di concept na - tif and let tif!
Hahahahaha! You are a wicked man, my brother.
You think say I wicked pass Reno O'mockery? Person wey talk say Obi no go come second or third for di next Presidential election, say na 4th him go take.
Sometimes I dey wonder di kin kain-kain wey dat man with him white goat bia-bia dey take wey dey make am reason like Akpos. Shey na the same Atiku wey Nigerians no gree see for diaspora so tey as them waka enter US na so dem waka comot. Him campaign strategy now na strictly insult. To sell him Oga now hard pass to sell foreign rice for village.
No mind am. Him no know say Obi go fit win di election.
No too shout am like that o! You no hear about the punches wey Soludo dey give Obi these day? You know say na madam testimony dey always strong pass side-chick own ba? Things wey Soludo talk sef, I no fit talk am but the summary be say him talk say Obi no go win.
(put hand for head) Chai! if Obi no go win then we don enter one chance be dat na.
My guy, cool down. We don dey inside one chance since 1960. Wetin wori me be say the the Soludo sef no gree talk about di Presidential candidate for him party, APGA, wey him talk say na di 3rd largest party be dat. But I bin see the national Chairman of APGA for TV dey talk say dem candidate, Prof Umeadi, go win di next Presidential election. As him see how their supporters surprise, him come talk say, "I know what you are thinking. But with God all things are possible". Bro, na dat one off me. People wey dey talk of structure wan come dey "on God".
E wan come be like say road don clear for Tinubu be that na.
Him health nko?
Nothing wey oyinbo no fit do. See as Baba strong kakaraka na.
Thunder ⚡ fire you! Na so we go dey dey?
The only problem now na the drug matter and shrouded history wey journalist dey talk since. But e bin get some Nigerian Presidents before wey dem no know where dem from come the only thing be say dem dey answer name of some states. Make I call names?
Shhh! Off ya mic. last last e be like every candidate get him own skeleton for inside room. Meanwhile, I hear say Tinubu don land for Jos in preparation for him flagoff today.
Yes o! And I hear say dem don pump money for the event but money still dey scarce. E be like say hijackers don dey practice their profession again o. In any case, make everything finish in peace. E no go make sense if ordinary person kill himself because of people wey go still chop for the same table tomorrow.
See as you dey mention "chop" like say food dey easy to find for this country. Make I go look for food chop jare. Na pipo wey don get food wey go reach their next life dey find votes now.
Some of dem dey find fuel for business now. You know say na another thing wey dey add their money be that.
And if dem catch dem nko?
Na to destroy the evidence na. Since wey dem dey talk about massive oil bunkering, you don hear any name? Na because di names dey inside fire that
Make I go house abeg. Everything don tire me.
Okay see you next week my brother!
#FreeLeahSharibu
#SecureNigeria
Comments
Post a Comment